kya pata ham ko mila hai apna
aur kuchh nashsha chaḌha hai apna
kaan paḌti nahin avaz koi
dil men vo shor bapa hai apna
ab to har baat pe hota hai guman
vaqi.a koi suna hai apna
har bagule ko hai nisbat ham se
dasht tak saaya gaya hai apna
ḳhud hi darvaze pe dastak di hai
ḳhud hi dar khol diya hai apna
dil ki ik shaḳh-e-burida ke siva
chaman-e-dahr men kya hai apna
koi avaz koi hangama
qafila rukne laga hai apna
apni avaz pe chaunk uThta hai
dil men jo chor chhupa hai apna
kaun tha madd-e-muqabil ‘baqi’
ḳhud pe hi vaar paḌa hai apna
Leave a Reply