Obaid Siddiqi
ab ye sifat jahan men nayab ho ga.i hai
malmal badan pe us ke kam-ḳhvab ho ga.i hai
koi pata de us ko meri kitab-e-jan ka
duniya ke saath vo bhi ik baab ho ga.i hai
phulon-bhari zamin ho ḳhushbu-bhari hon sansen
ye aarzu bhi meri kya ḳhvab ho ga.i hai
main bas ye kah raha huun rasm-e-vafa jahan men
bilkul nahin miTi hai kamyab ho ga.i hai
takmil pa raha hai ye kis ke ghar ka naqsha
divaren uTh chuki hain mehrab ho ga.i hai
chashme ubal rahe hain dasht o jabal se kaise
kya ye zamin itni sairab ho ga.i hai
Leave a Reply