Shahzad Nayar
ḳhamosh sadaon se na paigham se aaya
vo husn mire paas kisi kaam se aaya
aaya to nazar aaya mujhe ḳhar-e-zarurat
haa.e vo gul-e-ḳhas rah-e-am se aaya
jab raat Dhali yaad jigar chiir ke guzri
vaise to ḳhayal us ka mujhe shaam se aaya
anchal se ubhar aa.e hain joban ke ḳham-o-pech
is sher men iblagh bhi ib.ham se aaya
ye phuul mire qurb ke mausam ne khila.e
ye rang tire ruḳh pe mire naam se aaya
takta huun imarat ki falak-bos imarat
iflas mire ghar men usi baam se aaya
shohrat jo mili tujh ko bure kaam ne di hai
jo naam tire paas hai dushnam se aaya
khaTke se khaTak jaa.e na dildar so ‘nayyar’
aram-gah-e-husn men aram se aaya
Leave a Reply