abu-mohammad-sahar

Ye To Nahin Ki Baadiya-Paima Na Aaega

ye to nahin ki badiya-paima na aaega

ai dasht-e-arzu koi ham sa na aaega

chalna nasib-e-zist hai yuun hi chale chalo

is raste men shahr-e-tamanna na aaega

rah-e-vafa men qatra-e-shabnam bhi hai bahut

jis se bujhegi pyaas vo dariya na aaega

khud ho sake to apne andhere ujaal lo

ab koi sahab-e-yad-e-baiza na aaega

ai ahl-e-dil khamosh ki ye ja-e-sabr hai

dukh to yunhi rahenge masiha na aaega

gaahe vufur-e-shauq to gaahe hujum-e-yas

sab kuchh to aaega hamen jiina na aaega

baithe rahen ‘sahar’ yunhi divar o dar liye

apna jise kahen koi aisa na aaega

More Poems

Leave a Comment