ghazab hai ik but-e-kafir-ada ne luuT liya
ki mujh ko banda bana kar ḳhuda ne luuT liya
ye kis ki bazm men kam-baḳht le ga.iin nazren
nigah-e-naz ne maara haya ne luuT liya
jo dil ke paas tha sarmaya-e-havas-o-ḳhirad
nazar ne chhin liya aur ada ne luuT liya
vo dil ki jis ko bachaya tha dair-o-ka.aba se
tumhare husn-e-vara-ul-vara ne luuT liya
nahin nasib jo taj-e-shahi ko bhi ‘qaisar’
maza vo kasa-e-dast-e-gada ne luuT liya
Leave a Reply