saans lete hue Dar lagta hai
zahr-alud dhuan phaila hai
kis ne sahra men miri ankhon ke
ek dariya ko ravan rakkha hai
koi avaz na jumbish koi
mera hona bhi koi hona hai
baat kuchh bhi na karunga ab ke
ru-ba-ru us ke faqat rona hai
zaḳhm dho.e hain yahan par kis ne
saare dariya men lahu phaila hai
itna gahra hai andhera mujh men
paanv rakhte hue Dar lagta hai
shaḳhs hansta hai jo a.ine men
yaad paḌta hai kahin dekha hai
chaaT jaa.e na mujhe dimak sa
gham jo siine se mire lipTa hai
jaane kya khona hai ab bhi mujh ko
phir se kyuun ji ko vahi ḳhadsha hai
Leave a Reply