Asrarul Haq Asrar
hamen har saans dushvari lage hai
magar ye zindagi pyari lage hai
tumhen dhoka sahar ka hai to hoga
hamen to raat andhiyari lage hai
mire malbus par chhinTe lahu ke
tire daman ki gul-kari lage hai
zaban shayad yahi shorafa ki Thahre
tumhen jo aaj bazari lage hai
vafa kya hai ye tum us dil se puchho
ki jis dil ko ye bimari lage hai
mire qatil ko yarab hausla de
mujhe kandhon pe sar bhari lage hai
ghazal ‘asrar’ hoti hai mukammal
ki dil par choT jab kaari lage hai
Leave a Reply