Hatim Ali Mehr
ghair hanste hain faqat is liye tal jaata huun
main bayabanon men rone ko nikal jaata huun
josh vahshat ka hua mausam-e-gul aa pahuncha
kuchh dinon hosh men rahta huun sambhal jaata huun
apni rukhsat hai buton se bhi ab insha-allah
dair se su-e-haram aaj hi kal jaata huun
kucha-e-qatil-e-be-rahm jise kahte hain
main vahan daud ke mushtaq-e-ajal jaata huun
jab nikalne nahin dete hain mujhe zindan se
apne aape se main na-char nikal jaata huun
ghair albatta tire paanv men malte hain hina
main to aa kar kaf-e-afsos hi mal jaata huun
main jo rota huun to kahta hai na kar bad-shaguni
baat kahta hai vo aisi ki dahal jaata huun
dost hota hai to hota hai vo dushman ai ‘mehr’
vo badal jaata hai ya kuchh main badal jaata huun
Leave a Reply