hain nik.hat-e-gul baagh men ai bad-e-saba ham
dam bhar men numudar hain dam bhar men fana ham
tashrif to le aa.en vo ruThe rahen ham se
jhagḌa to miTe sulh bhi ho ja.egi baham
ham tere shanasa hain hamen ghair se kya kaam
agah kisi se bhi nahin tere siva ham
puchha tha ye main ne ki miTa.ega mujhe kaun
qismat abhi ḳhamosh thi jo us ne kaha ham
vo kahte hain da.ava hai use hosh-o-ḳhirad ka
‘beḳhud’ ko pila.enge mai-e-hosh-ruba ham
Leave a Reply