Dil Nahin Pahlu Mein Dard-E-Dil Nahin

dil nahīñ pahlū meñ dard-e-dil nahīñ

aah ab jiine kā kuchh hāsil nahīñ

sard hai hañgāma-e-bazm-e-jahāñ

maiñ nahīñ to garmī-e-mahfil nahīñ

aarzū jab thī hazāroñ the harīf

ab koī bhī ġham-gusār-e-dil nahīñ

ai nigāh-e-shauq tū dhokā na de

vo to hai hadd-e-nazar sāhil nahīñ

‘rāz’ mil jaatī hai fikroñ se najāt

shā.irī kā aur kuchh hāsil nahīñ

Leave a Comment