Sahir Dehlavi
ayaan ho rang men aur misl-e-bu gul men nihan bhi ho
jahan-e-jan hue gul-pairahan jan-e-jahan bhi ho
makin kaunain men ho fil-haqiqat la-makan bhi ho
azal se ta-abad qaa.em ayaan bhi ho nihan bhi ho
par-e-parvaz-e-anqa la.enge gar la-makan bhi ho
tumhen ham DhunDh la.enge kahin bhi ho jahan bhi ho
kahan hain hazrat-e-isa kahan hain hazrat-e-musa
ayaan e.ajaz men ho aur tajalli men nihan bhi ho
ghashi ho aur ghashi men hosh bhi kuchh kuchh rahe baaqi
vo husn-e-la-yazali kuchh ayaan bhi kuchh nihan bhi ho
jalana marna e.ajaz hai us chashm-e-pur-fan ka
hayat-e-javidan ho aur marg-e-na-gahan bhi ho
jo ankhen hon to husn-o-ishq ki surat nazar aa.e
ayaan ho rang-e-gul men saut-e-bulbul men nihan bhi ho
yahan dair-o-haram men ho vahan mai-ḳhane men ‘sahir’
barahman ho janab-e-shaiḳh ho pir-e-mughan bhi ho
Leave a Reply