Hamid Iqbal Siddiqui
jazb ki sab intihaon ka tamasha har-taraf
tum kaha the tum nahin the main hi main tha har-taraf
ye mire dil men simaT aa.egi ik din dekhna
tum ne kis aalam men phaila.i thi duniya har-taraf
dasht men bhi aa mile the ka.enati silsile
vahshaton ne kar diya tha mera charcha har-taraf
tum ne mere dar pe la chhoḌa use achchha kiya
varna yuun hi be-sabab ye gham bhaTakta har-taraf
mere haq men to har-ik mausam ḳhizan-asar tha
kis ki sanna.i ne gul-manzar sajaya har-taraf
Leave a Reply