muddat ke ba.ad munh se lagi hai jo chhuT kar
to ye bhi mai pe girti hai kya TuuT TuuT kar
mehndi tha mera ḳhuun ki hota jo ra.egan
ik shab ke ba.ad haath se qatil ke chhuT kar
pahla hi din tha ham ko kiye tark-e-mai-kashi
kya kya paḌa hai raat ko menh TuuT TuuT kar
sabr o qarar le ke diya dagh-e-arzu
abad tum ne dil ko kiya mujh ko luuT kar
hairat hai mere aḳhtar-e-baḳht-e-siyah ko
kyuun kar gahan se chand nikalta hai chhuT kar
allah-re ansuon ka khaTakna firaq men
ankhon men bhar gaya koi almas kuuT kar
Tapke nahin qalam ke faqat ashk naama par
vo kuchh likha ki roi siyahi bhi phuuT kar
kar band-o-bast abhi se na gulshan men baghban
vo din to ho ki murgh-e-qafas aa.en chhuT kar
sad-haif sar-guzisht jo apni kahi ‘jalal’
tu is ko dastan samajh sach ko jhuuT kar
Leave a Reply