Khaleel Rampuri
main ne to ik baat kahi thi baat ko phailaya hai kitna
ab main samjha huun duniya ne mujh ko pahchana hai kitna
jaane kis ne thappaḌ maara kaale badal ke chehre par
main ne dekha hai badal ko ghusse men barsa hai kitna
laThi paani men Dalon to vapas aati hai paani par
dariya zor-avar hai kitna mera sarmaya hai kitna
kal main ne kuchh chehre dekhe cafe ke ik lawn men baiThe
kya batla.un mujh ko us ka chehra yaad aaya hai kitna
us se mil kar ḳhush hota huun phir is soch men kho jaata huun
bahar se ujla hai kitna andar se kaala hai kitna
‘rampur’ ji ye mat puchho dil mera rone lagta hai
kya bolon socha hai kitna aur us ko paaya hai kitna
Leave a Reply