ik manzar-e-ra.ana.i afaq men har su hai
taron men tira jalva phulon men tiri bu hai
chaha tha ki apne ko ik yaar zara dekhun
dekha to yahi dekha ai dost tu hi tu hai
sajde men rahega sar jo chahe sitam kar le
teri jo vo aadat hai apni bhi yahi ḳhu hai
ik alam-e-hairat men Duuba hua rahta huun
allah re mira aalam aalam men tu hi tu hai
divana banaya hai kyon us ki mohabbat ne
ai be-ḳhabar-e-duniya duniya ram-e-ahu hai
jannat ke tasavvur ki is vaqt kahan fursat
ra.ana.i-e-saqi hai sabza hai lab-e-ju hai
insan ka dil kya hai duniya-e-havadis men
TuuTa hua taara hai Tapka hua aansu hai
Leave a Reply