Kisi Ki Yaad Aafat Dha Rahi Hai

kisī kī yaad aafat Dhā rahī hai

tabī.at ḳhud-baḳhud ghabrā rahī hai

chalā huuñ us nazar kī justujū meñ

jahāñ dil hai vo manzil aa rahī hai

mohabbat ko nahīñ samjhī hai ab tak

magar duniyā hameñ samjhā rahī hai

yahī hai kyā mohabbat kā zamāna

zamāne par udāsī chhā rahī hai

unheñ jī bhar ke ab dekheñge ‘shāhid’

ye sunte haiñ qayāmat aa rahī hai

Leave a Comment