mohtaj-e-ajal kyuun hai ḳhud apni qaza ho ja
ghairat ho to marne se pahle hi fana ho ja
ai shauq-e-talab baḌh kar majnun-e-ada ho ja
ai himmat-e-mardana razi-ba-raza ho ja
aghosh-e-fana men ham parvarda-e-afat hain
ai fitna-e-dauran uTh ai hashr bapa ho ja
zid aur ye zid ai dil achchha to ḳhuda-hafiz
qurban hi us but par hota hai to ja ho ja
us jan-e-tamanna se be-parda na shikva kar
vo tujh se ḳhafa hai to jiine se ḳhafa ho ja
har qafla-e-dil ko tu muzhda-e-manzil de
har rahguzar-e-gham men naqsh-e-kaf-e-pa ho ja
ye dard-e-mohabbat bhi kya shai hai ma.az-allah
main dard-e-mohabbat se kahta huun siva ho ja
zalim ka na shikva kar zulmon ki na parva kar
tu apni vafaon ki izzat pe fida ho ja
is hasti-e-fani se kar qat-e-nazar ‘fani’
tu dost ka talib hai dushman se juda ho ja
Leave a Reply