dard ḳhamosh raha TuTti avaz rahi
meri har shaam tiri yaad ki hamraz rahi
shahar men jab bhi chale ThanDi hava ke jhonke
tapte sahra ki tabi.at baḌi na-saz rahi
aa.ine TuuT ga.e aks ki sachcha.i par
aur sachcha.i hamesha ki tarah raaz rahi
ik na.e moḌ pe us ne bhi mujhe chhoḌ diya
jis ki avaz men shamil miri avaz rahi
sunta rahta huun buzurgon se main aksar ‘tahir’
vo sama.at hi rahi aur na vo avaz rahi
Leave a Reply