Mohsin Bhopali
hai vaj.h-e-tamasha-e-jahan dil-shikani bhi
manzur hai ai dost! ye neze ki ani bhi
shadab daraḳhton ke bhi saa.e hain gurezan
ik jurm hui meri gharib-ul-vatani bhi
piite hi rahe gardish-e-ayyam ke hathon
sahba-e-malamat bhi gham-e-ta.ana-zani bhi
socha tha ki us bazm men ḳhamosh rahenge
mauzu-e-suḳhan ban ke rahi kam-suḳhani bhi
ai silsila-e-nik.hat-e-gesu ke asiro!
hai ishq men ik marhala-e-koh-kani bhi
viran jaziron ki tarah ḳhushk hain ankhen
bekar hai ai dard tiri nala-zani bhi
ai nazish-e-sad-rang na kar un se taghaful
hai ḳhak-nashinon se tiri gul-badani bhi
Leave a Reply