Nivesh Sahu
mujh men paivast ho chuki ho tum
mere andar ki ḳhamushi ho tum
kya faqat shauq rah gaya huun main
kis tarah baat kar rahi ho tum
ḳhaas ye hai ke main nahin badla
aur dilchasp ke vahi ho tum
itna andaza-e-safar hai mujhe
aḳhiri moḌ pe khaḌi ho tum
kis qadar chiḳhne laga huun main
kitni ḳhamosh ho ga.i ho tum
ḳhvab men kya dikha.i paḌta hai
kis ke kandhe pe so rahi ho tum
ek dhakka sa lag gaya hai mujhe
sun liya hai ke ro rahi ho tum
Leave a Reply