Altaf Mashhadi
phir ka.enat-e-yad pe lahra ga.i hain vo
siine men ek aag si sulga ga.i hain vo
allah re chashm-e-shoḳh ka nazzara-e-hasin
dil men nazar ke saath hi ḳhud aa ga.i hain vo
ai arzu-e-did nigahon ka kya qusur
uThte hi un ke baam pe sharma ga.i hain vo
aa.ega phir se aankh men savan shabab par
lahore se suna hai ki ukta ga.i hain vo
roti hai aarzu miri siine pe rakh ke haath
shayad nazar ke tiir se barma ga.i hain vo
‘altaf’ aa rahi thiin uTha.e hue naqab
paate hi mujh ko raah men ghabra ga.i hain vo
Leave a Reply