Phir Kaenat-E-Yaad Pe Lahra Gai Hain Wo

phir kā.enāt-e-yād pe lahrā ga.ī haiñ vo

siine meñ ek aag sī sulgā ga.ī haiñ vo

allāh re chashm-e-shoḳh kā nazzāra-e-hasīñ

dil meñ nazar ke saath hī ḳhud aa ga.ī haiñ vo

ai ārzū-e-dīd nigāhoñ kā kyā qusūr

uThte hī un ke baam pe sharmā ga.ī haiñ vo

aa.egā phir se aañkh meñ sāvan shabāb par

lahore se sunā hai ki uktā ga.ī haiñ vo

rotī hai aarzū mirī siine pe rakh ke haath

shāyad nazar ke tiir se barmā ga.ī haiñ vo

‘altāf’ aa rahī thiiñ uThā.e hue naqāb

paate hī mujh ko raah meñ ghabrā ga.ī haiñ vo

Leave a Comment