Mela Ram Wafa
barson se huun main zamzama-pardaz-e-mohabbat
aa.i na javaban kabhi avaz-e-mohabbat
ik dard mohabbat hai miri har rag-o-pai men
har saans hai ab mera ik avaz-e-mohabbat
har-chand ki har bazm men Thukra.i ga.i hai
avaz-e-mohabbat hai phir avaza-e-mohabbat
ma.amur hain avaz-e-mohabbat se faza.en
mastur hai go sahib-e-avaz-e-mohabbat
aa jaa.e zara sina-e-afaq men garmi
ho jaa.e zara sho.ala-zan avaz-e-mohabbat
ye daur hai daur-e-havas is daur men ai dil
sunta nahin dil se koi avaz-e-mohabbat
jis shaḳhs ke siine men hai dil ki jagah patthar
samjhega vo kya ma.ani-e-avaz-e-mohabbat
is daur-e-tag-o-dau men vafa kaun sunega
kitni hi dil-avez ho avaz-e-mohabbat
Leave a Reply