rah-e-be-sā.ebāñ se koī rishta joḌ kar dekhūñ
maiñ apne shahr kī saarī fasīleñ toḌ kar dekhūñ
havā ke ruḳh pe uḌte abr ko rokūñ bhalā kaise
jo rasta ḳhushk hai to aabla hī phoḌ kar dekhūñ
ta.ayyun to karūñ kis samt meñ mujh ko bhaTaknā hai
kisī ke saath ho luuñ yā kisī ko chhoḌ kar dekhūñ
tumhārā aks merī aañkh par kyoñ khil nahīñ paatā
is ā.īne ke andar kyā hai is ko toḌ kar dekhūñ
mujhe lagtā to hai maiñ bhī kisī raste kī manzil huuñ
zarā ik zindagī ke zāviye ko moḌ kar dekhūñ