vo ek ḳhema-e-shab jis ka naam duniya tha
kabhi dhuan to kabhi chandni sa lagta tha
hamari aag bhi taapi hamen bujha bhi diya
jahan paḌav kiya tha ajiib sahra tha
hava men meri ana bhigti rahi varna
main ashiyane men barsat kaaT sakta tha
jo asman bhi TuuTa gira miri chhat par
mire makan se kisi bad-dua ka rishta tha
tum aa ga.e ho ḳhuda ka subut hai ye bhi
qasam ḳhuda ki abhi main ne tum ko socha tha
zamin pe TuuT ke kaise gira ghurur us ka
abhi abhi to use asman pe dekha tha
bhanvar lapeT ke niche utar gaya shayad
abhi vo shaam se pahle nadi pe baiTha tha
main shaḳh-e-zard ke matam men rah gaya ‘qaisar’
ḳhizan ka zahr shajar ki jaḌon men phaila tha
Leave a Reply