poet

Sabr Kar Sabr Dil-E-Zar Ye Wahshat Kya Hai

sabr kar sabr dil-e-zar ye vahshat kya hai

dasht-e-pur-khar men jaane ki zarurat kya hai

ik tahayyur men pada huun nahin milta hai pata

chashm-e-be-khvab men ye surat-e-hasrat kya hai

dil men baithe hain to phir munh ka chhupana kaisa

ai but-e-hosh-ruba aap ki aadat kya hai

loriyan degi qaza chain se so jaenge

tere bimar ko marne ki zarurat kya hai

nek-o-bad jab tiri marzi pe hue hain mauquf

bakht kahte hain kise aur ye qismat kya hai

dam-e-akhir hai mira tum sar-e-balin aao

ek saaat ke thaharne men qabahat kya hai

roz-e-ishrat men samajhti huun ‘jamila’ is ko

log kis vaste Darte hain qayamat kya hai

More Poems

Leave a Comment