Zakauddin Shayan
hare mausam khilenge sona ban ke ḳhaak badlegi
kahan tak ye zamin aḳhir na.i poshak badlegi
hasin ma.asum honTon par mohabbat ke sabaq taaza
kabhi to aadmi ki fitrat-e-chalak badlegi
ravan hai ab-o-ḳhun sar pattharon ko phoḌne diije
nadi sailab ki rau men ḳhas-o-ḳhashak badlegi
saliqa zindagi ki vahshaton ko milne vaala hai
qaba us ki yaqinan daman-e-sad-chak badlegi
chhabakti shabnamin ankhon men najm-o-gul ke afsane
na.i karvaT abhi shayad hamari ḳhaak badlegi
dhule kapḌon pe dagh-e-ḳhushbu rang-e-zindagi raushan
tiri qurbat se dil ki sar-zamin-e-pak badlegi
Leave a Reply