Poet
haath se dil ro ke khona yaad hai
apni kashti ko Dubona yaad hai
munh chhupa kar mujh ko rona yaad hai
vo ḳhajil har ik se hona yaad hai
hijr men vo jaan khona yaad hai
sub.h hona shaam hona yaad hai
marte marte haath siine par rahe
dard ka tham tham ke hona yaad hai
kyuun jahan men aa.e the samjhe na kuchh
un ka hansna apna rona yaad hai
jagna apna nahin bhola huun main
aur saare ghar ka sona yaad hai
marte dam duniya nihayat tang thi
qabr ka vo ek kona yaad hai
kaun tha balin pe mast-e-ḳhvab-e-naz
sham.a ka ruḳhsat vo hona yaad hai
dil men paani ne laga di aag aaj
vo hina.i haath dhona yaad hai
kab na tha ‘javed’ aahon men asar
pher kar munh un ka rona yaad hai
Leave a Reply