Poet
aafat shab-e-tanha.i ki Tal jaa.e to achchha
ghabra ke jo dam aaj nikal jaa.e to achchha
o jan-e-hazin jaana hai ik din tujhe aḳhir
ab jaa.e to behtar hai ki kal jaa.e to achchha
jhukva diya sar zo.af ne qatil ke qadam par
talvar agar us ki ugal jaa.e to achchha
behtar nahin hai surat-e-janan ka tasavvur
dil aur kisi shai se bahal jaa.e to achchha
ik sil hai kaleje pe nahin ruuh badan men
chhati ka pahaḌ aah pe Tal jaa.e to achchha
divana abas shahr ki galiyon men hai barbad
majnun kisi jangal ko nikal jaa.e to achchha
o atish-e-dil phunk de tan ashk baha de
bah jaa.e to behtar hai ye jal jaa.e to achchha
har martaba Dasne ke irade men hai vo zulf
azhdar ye agar mujh ko nigal jaa.e to achchha
phir rukna hai dushvar ye jab aa.i to aa.i
aise men tabi.at jo sambhal jaa.e to achchha
tabut mira tham ke uThao mire yaaro
vo bhi kaf-e-afsos jo mal jaa.e to achchha
ai ‘rind’ milo yaar se ya haath uThao
jhagḌa chuke har shab ka ḳhalal jaa.e to achchha
Leave a Reply