Zubair Ali Tabish
vo paas kya zara sa muskura ke baiTh gaya
main is mazaq ko dil se laga ke baiTh gaya
jab us ki bazm men dar-o-rasan ki baat chali
main jhaT se uTh gaya aur aage aa ke baiTh gaya
daraḳht kaaT ke jab thak gaya lakaḌ-hara
to ik daraḳht ke saa.e men ja ke baiTh gaya
tumhare dar se main kab uThna chahta tha magar
ye mera dil hai ki mujh ko uTha ke baiTh gaya
jo mere vaste kursi lagaya karta tha
vo meri kursi se kursi laga ke baiTh gaya
phir us ke ba.ad ka.i log uTh ke jaane lage
main uTh ke jaane ka nusḳha bata ke baiTh gaya
Leave a Reply