Shaukat Pardesi
gham ki andheri rahon men to tum bhi nahin kaam aao ho
kyuun be-kar karo ho hujjat aage baat baḌhao ho
kyuun tham tham kar qadam rakho ho kyuun itna ghabrao ho
raat ka sannaTa hai main huun tum kis se sharmao ho
aao apne haath men le kar haath hamara dekho to
ham ne suna hai tum sab ki qismat ka haal batao ho
pahle pahar jab aa na sake tum aḳhir-e-shab ki fikr hi kya
ab to dil hi sulag uTTha hai ab kyuun diya jalao ho
ik dastur sahi duniya ka zaḳhmon par lafzon ka Dher
ai logo kuchh samjho bhi ho jo mujh ko samjhao ho
shaam nahin Dhalti kisi surat raat nahin kaTti kisi taur
ab to bahut dil ghabra.e hai ab to bahut yaad aao ho
hain ahbab bhi ik sarmaya lekin ye bhi yaad rahe
utni hi aanch lagegi ‘shaukat’ jitna tez alaav ho
Leave a Reply