koi dam thamta nahin baran-e-ashk
al-aman az chashm-e-pur tufan-e-ashk
kis lab-e-mai-gun ki khvahish hai mudam
josh-zan hai ye mai-e-joshan-e-ashk
shor nalon ka mire sun dam-ba-dam
sahmgin hain yak-qalam tiflan-e-ashk
kashti-e-gardun yaqin hai Duub jaae
badh chala hai bahr-e-be-payan-e-ashk
shauq men us silk-dandan ki mudam
hain nikalte ye durr-e-ghaltan-e-ashk
jal ke hota khaak soz-e-dil se tan
gar na karti aankh ye saman-e-ashk
faiz se khun-e-dil-e-majruh ki
rashk-e-gulshan ho gaya daman-e-ashk
dho gaya khatir se janan ki ghubar
jaan par meri hai ye ehsan-e-ashk
huun main giryan ishq-e-khadim-shah main
is liye ‘asim’ huun main nazan-e-ashk