mujhe bhi niim ke jaisa na kar de
ki talḳhi ziist ki kaḌva na kar de
ye teri aarzu aisa na kar de
zamane men mujhe rusva na kar de
mohabbat zindagi se vo bhi behad
kahin ye zindagi dhoka na kar de
tu is se qabl ho ankhon se ojhal
mira malik mujhe andha na kar de
ata kar de ilahi phir se bachpan
mujhe har fikr se begana kar de
saja de din men taare shab men suraj
agar vo chahe to kya kya na kar de
siyasat ke agar bas men ho ‘gauhar’
mohabbat par bhi vo jurmana kar de
Leave a Reply