TuuTe hue diye ko sunsan shab men rakkha
us par miri zaban ko hadd-e-adab men rakkha
kis ne sikhaya saa.il ko bhuuk ka tarana
phir kis ne la ke kaasa dast-e-talab men rakkha
muflis ki chhat ke niche kumhla ga.e hain bachche
phulon ko la ke kis ne chashm-e-ghazab men rakkha
parvardigar ne to taqva ki baat ki thi
tum ne fazilaton ko nam-o-nasab men rakkha
dar-asl tum se mil kar main ḳhud se mil sakunga
bas ek hi sabab hai darussabab men rakkha
bas dil ki anjuman hai yadon ke nastaran hain
ab aur kya hai baaqi is jan-ba-lab men rakkha
‘ahmad’ men baat dil ki kahta to kis se kahta
naghma sukut ka tha shor-o-shaghab men rakkha
Leave a Reply