muqabla ho to siine pe vaar karta hai
vo dushmani bhi baḌi pur-vaqar karta hai
jo ho sake to use mujh se duur hi rakhiye
vo shaḳhs mujh pe baḌa e’tibar karta hai
nagar men us ki bahut dushmani ke charche hain
magar vo pyaar bhi divana-var karta hai
main jis ḳhayal se daman-kashida rahta huun
vahi ḳhayal mira intizar karta hai
shikayaten use jab doston se hoti hai
to doston men hamen bhi shumar karta hai
Leave a Reply