Apni Pursish Jo Ho Arbab-E-Wafa Se Pahle

apni pursish jo ho arbab-e-vafa se pahle

mangiye daulat-e-didar khuda se pahle

jhuk gaya vo shah-e-husn aa ke gada se pahle

kham hui zulf-e-dota qadd-e-dota se pahle

chashm-e-mushtaq ladi chashm-e-dota se pahle

samna hoga balaon ka bala se pahle

tu har ik asfal-o-aala ka hai razzaq karim

ustukhvan sag ko pahunchta hai huma se pahle

baad-hu chehra-e-janan ke muqabil ai charkh

chand munh us ke milae kaf-e-pa se pahle

baad bhi zikr kiya ho jo vafadari ka

sar qalam kijiye shamshir-e-jafa se pahle

khun-e-dil hijr men piita huun to gham khata huun

ki dava piite hain bimar ghiza se pahle

shauq-e-gul surat-e-bulbul khatar-e-gulchin hai

subh-dam baagh men jaata huun saba se pahle

ghaflat-e-qalb se zuhhad padhen baad-e-namaz

barahman sajda kare but ko khuda se pahle

takht-e-tabut ravan bhi hai ajab takht-e-ravan

shaah takiye men pahunchta hai gada se pahle

misl-e-musa mujhe ghash aae na ho tum ko hijab

vaada-e-vasl jo iifa ho haya se pahle

shokh ne mehndi mali haath men main qatl hua

rang laega lahu rang-e-hina se pahle

pa-e-qatil jo pas-e-marg bhi thokar maare

nazr sar kijiye taslim-o-raza se pahle

ru-ba-ru tere hua asfal-o-aala ka zuhur

ilm-e-khaliq men tu tha arz-o-sama se pahle

kya bayan rutba-e-aala-e-ali ko main karun

sair-e-mearaj ki mahbub-e-khuda se pahle

dast-giri jo hai bande ki khuda ko manzur

uthte hain dast-e-dua ‘arsh’ dua se pahle

Leave a Comment