Shumama Ufuq
ye asman zamin ke honT chumta hua na ho
kise ḳhabar hai kal talak yahan pe kya ho kya na ho
vo mujh se mil ke bhi kisi se vasl ki dua kare
ajiib peḌ hai jo paani pi ke bhi hara na ho
ye dastaken kivaḌ par baras rahi hain jis tarah
kivaḌ hi ki nabz-ashna koi hava na ho
vo kam-suḳhan sahi magar koi to aur baat hai
ḳhamoshiyon ki aaḌ men vo dard sah raha na ho
main tum se apne dil ki vardat kah to duun magar
agar hamara rasta yahin kahin juda na ho
gale laga rahi ho to ḳhayal bhi rahe ‘ufuq’
tumhen jo ishq lag raha hai asl men bala na ho
Leave a Reply