dawam

Afroz Alam

main tumhare faisle ka hasil huun

tum mujh se be-vaj.h ulajhte ho

main ne jo tumhen kamyabiyan diin

khushiyan ata kiin

use kyuun nahin shumar karte

tumhari harkaton se dar aane vaali

zindagi bhar ki nakamiyan

talkhiyon ki surat

jab tumhare rag-o-pai men

paivast ho chuki hain

to

tum mujh se ulajh rahe ho

tum ye samajhte ho

ki main koi azad parinda huun

jo jab chaha jahan chaha

sub.h-o-sham kar liya

nahin

main ek zimmedar mausam ki tarah

apni ungliyon men

hua ke dor

lipta kar

daman-e-asman par naqsh-o-nigar

bana deta huun