Asar Lakhnavi
ashk-e-gul-rang nisar-e-gham-e-janana karen
aaj teri hi ḳhushi ai dil-e-divana karen
dard-mandon se ye kah do ki ba-a.in-e-niyaz
dil ko zauq-karam yaar se begana karen
taaki asuda-e-hirman dil-e-gham-kosh na ho
do ghaḌi zikr-e-mai-o-saqi-o-paimana karen
bu-e-ḳhush teri nahin jin ke masham-e-jan men
rang-o-nik.hat ka gulon ko vahi paimana karen
ka.aba-o-dair-o-kalisa ki fazaon se alag
aao ta.amir mohabbat ka jilau-ḳhana karen
itni fursat hi kahan hai ki tire soḳhta-jan
jalne marne men ham-ahangi-e-parvana karen
apni hasti ki faqat itni hai rudad ‘asar’
jaise mansub haqiqat se ik afsana karen
Leave a Reply