Pandit Vidya Rattan Asi
ham par nigah-e-lutf kabhi hai kabhi nahin
tum hi kaho ye kya hai agar dil lagi nahin
go ji raha hai aaj bhi koi tire baghair
lekin ye zindagi to koi zindagi nahin
us ki bala se koi jiye ya koi mire
jis ko kisi ke dard ka ehsas hi nahin
dil men na aarzu hai koi ab na valvala
ik sham.a jal rahi hai magar raushni nahin
aḳhir ham un ke va.adon par iman laa.en kya
jo ham pe mehrban abhi hai abhi nahin
is guftugu ki tarz men tarmim kijiye
kab tak main ḳhamoshi se sunun aap ki nahin
‘asi’ zaban-e-ḳhamushi men dastan-e-shauq
ham ne kahi hai barha us ne suni nahin
Leave a Reply