har aan jalva nai aan se hai aane ka
chalan ye chalte ho ashiq ki jaan jaane ka
qasam qadam ki tire jab talak hai dam men dam
main paanv par se tire sar nahin uthane ka
hamari jaan pe girti hai barq-e-gham zalim
tujhe to sahl sa hai shaghl muskurane ka
qasam khuda ki main kuchh kha ke so rahunga sanam
jo saath apne nahin mujh ko tu sulane ka
nasib us ke sharab-e-bahisht hove mudam
hua hai jo koi mujid sharab-khane ka
bahut se khun-kharabe machenge khana-kharab
yahi hai rang agar tere paan khane ka
hamari chhati pe phirta hai saanp yaan ‘ehsan’
vahan hai shaghl use zulf ke banane ka