Sahartab Roomani
hijrat bhi vahi naql-e-makani bhi vahi hai
ham ḳhana-ba-doshon ki kahani bhi vahi hai
ye sha.iri karna koi asan hai yaaro
jo baat chhupani hai batani bhi vahi hai
kamre men tire hijr ke jaale bhi vahi hain
divar pe tasvir purani bhi vahi hai
ghar bhi hai abhi tak tiri ḳhushbu se mo.attar
angan men mire raat ki raani bhi vahi hai
ankhon men tira aks liye peḌ khaḌe hain
rasta ye vahi hai ye nishani bhi vahi hai
badla nahin kuchh bhi hai vahi dasht-navardi
aur ishq ke dariya ki ravani bhi vahi hai
mahfil men tujhe dekh ke ḳhamosh hua huun
varna to miri zud-bayani bhi vahi hai
ik shaḳhs ne kya mujh ko ḳharida ki ‘sahar’ main
arzan hua aisa ki girani bhi vahi hai
Leave a Reply