Farhat Ehsas
raah ki kuchh to rukavaT yaar kam kar dijiye
aap apne ghar ki ik divar kam kar dijiye
aap ka ashiq bahut kamzor dil ka hai huzur
dekhiye ye shiddat-e-inkar kam kar dijiye
main bhi honTon se kahunga kam karen jalne ka shauq
aap agar sargarmi-e-ruḳhsar kam kar dijiye
ek to sharm aap ki aur us pe takiya darmiyan
donon divaron men ik divar kam kar dijiye
aap to bas kholiye lab bosa dene ke liye
bosa dene par jo hai takrar kam kar dijiye
raat ke pahlu men phaila dijiye zulf-e-daraz
yunhi kuchh tul-e-sab-e-bimar kam kar dijiye
ya idhar kuchh tez kar diije gharon ki raushni
ya udhar kuchh raunaq-e-bazar kam kar dijiye
vo jo pichhe rah ga.e hain tez-raftari karen
aap aage hain to kuchh raftar kam kar dijiye
haath men hai aap ke talvar kiije qatl-e-am
haan magar talvar ki kuchh dhaar kam kar dijiye
bas mohabbat bas mohabbat bas mohabbat jan-e-man
baaqi sab jazbat ka iz.har kam kar dijiye
sha.iri tanha.i ki raunaq hai mahfil ki nahin
‘farhat-ehsas’ apna ye darbar kam kar dijiye
Leave a Reply