roz dilha-e-mai-kashan tuute
ai khuda jam-e-asman tuute
dushmani is zamin ki dekho
gumbad-e-qabr-e-dostan tuute
vasf-e-abru-e-pur-shikan jo na ho
kya ajab khanjar-e-zaban tuute
rang laae agar shikasta-dili
bulbulo shakh-e-ashiyan tuute
nikhat-e-gul se bas gaya gulshan
ghuncha kya chatke itr-dan tuute
khuub phaili hai bu-e-bada-e-ishq
shisha-e-dil kahan kahan tuute
le udegi hava-e-bam hamen
na karenge jo nardban tuute
qasd-e-parvaz ka jo bojh pada
bazu-e-murgh-e-na-tavan tuute
lucknow chal ke ji lagaun ‘munir’
kis liye dil mira yahan tuute