Tere Ahl-E-Dard Ke Roz-O-Shab Isi Kashmakash Mein Guzar Gae

Shamim Jaipuri

tire ahl-e-dard ke roz-o-shab isi kashmakash men guzar ga.e

kabhi gham men Duub ke rah ga.e kabhi Dubte hi ubhar ga.e

ye maqam-e-ishq hai kaun sa na shikayaten hain na shukriya

jo tire sitam pe nisar the vo tire karam se bhi Dar ga.e

sar-e-rah dair-o-haram kahin jo mile bhi hon to ajab nahin

hamen kya ḳhabar tiri justuju men kahan kahan se guzar ga.e

hain vafa ki rah-e-daraz men na.i manzilen na.e marhale

vo banenge kya mire ham-safar jo qadam qadam pe Thahar ga.e

jinhen naḳhuda se umiid thi unhen naḳhuda ne Dubo diya

jo ulajh ke rah ga.e mauj se vo kabhi ke paar utar ga.e

jo kabhi sharab-e-nashat hai to hai zahr-e-gham kabhi jaam men

hai ye zindagi koi zindagi abhi ji uThe abhi mar ga.e

vo nigah kaisi nigah thi ki ‘shamim’ se vo na chhup sake

ye ada bhi qabil-e-did hai jo mile to bach ke guzar ga.e