faisla koi bulandi pe pahunch kar hoga
jab mire samne har shahr ka manzar hoga
aur kuchh der ise raund ke ḳhush ho ja.un
aankh khulte hi ye suraj mire sar par hoga
kashtiyan aaj se pahle huiin kitni gharqab
is ka andaza samundar men utar kar hoga
ik nujumi ne bata.i hai baḌe kaam ki baat
kal ka din aaj se har haal men behtar hoga
kyuun na main apne qadam soch samajh kar rakkhun
vo ta.aqub men mire saath to aksar hoga
is ke saa.e men chhupe baiThe hain kitne afrad
is ka andaza to divar gira kar hoga
toḌ Daale the dar-o-bam safar se pahle
muntazir mere liye phir bhi mira ghar hoga
ghuTniyon chalna abhi aaj hi sikha hai ‘zafar’
kal ye bachcha bhi mire qad ke barabar hoga
Leave a Reply