Pandit Vidya Rattan Asi
baiThe ho sar-e-rahguzar kyon nahin jaate
tum log to ghar vaale ho ghar kyon nahin jaate
ye vaqt ke hakim hain suna vaqt ke hakim
ye kahte hain mar jaao to mar kyon nahin jaate
is baat se zahir hai tumhin ek ḳhuda ho
ham varna kisi aur ke dar kyon nahin jaate
pal hi men guzar jaati hai sukh-chain ki raten
dukh-dard ke din pal men guzar kyon nahin jaate
muddat se kurede bhi nahin yaad kisi ki
phir zaḳhm mire siine ke bhar kyon nahin jaate
is daur men jiina hai to makkar ka jiina
ye baat haqiqat hai to mar kyon nahin jaate
itne hi agar tang ho is shahar se ‘asi’
chupke se kisi duur nagar kyon nahin jaate
Leave a Reply