Rasheed Lakhnavi
mujh ko manzur hai marne pe subuk-bari ho
aur ahbab ko hai fikr kafan bhari ho
zindagi men na mila zaḳhm-e-jigar ko marham
ḳhair chadar hi miri qabr ki zangari ho
yaad hai roz-e-azal dil jo garan hai kya gham
main ne ḳhud kah ke liya tha ki zara bhari ho
atish-e-husn javanan-e-chaman bhaḌka de
jo gul-e-surḳh ki patti ho vo chingari ho
teri rahmat ke sahare pe gina karta huun
tark kar duun agar is men bhi gunah-gari ho
mujh siyahkar ki hai mohr to uThti nahin mehr
mere allah na itni bhi giran-bari ho
aj-kal paas hai phir naqd-e-dil-e-zar ‘rashid’
phir kisi ghairat-e-yusuf ki ḳharidari ho
Leave a Reply