Kashif Rafiq
ḳhvabon ki ka.enat men khone nahin diya
tere ḳhayal ne mujhe sone nahin diya
gardish men rakkha teri kashish ne mujhe sada
ab tak kisi Thikane ka hone nahin diya
har ma.arke se ziist ke nikla huun surḳh-ru
bas ye ki dil men ḳhauf samone nahin diya
zaḳhmon se tha niDhal magar mauj-e-vaqt ko
chahat ka naqsh siine se dhone nahin diya
ik hadse ki yaad ne dil ki zamin men
ḳhvahish ka tuḳhm phir kabhi bone nahin diya
‘kashif’ kamal-e-zabt ne rakkha mira bharam
zalim ke samne mujhe rone nahin diya
Leave a Reply