Hafeez Jaunpuri
hue ishq men imtihan kaise kaise
paḌe marhale darmiyan kaise kaise
rahe dil men vahm-o-guman kaise kaise
sara men Tike karvan kaise kaise
ghar apna gham-o-dard samjhe hain dil ko
bane mezban mehman kaise kaise
shab-e-hijr baten hain divar-o-dar se
mile hain mujhe raz-dan kaise kaise
dikhata hai din-rat ankhon ko meri
siyah-o-safed asman kaise kaise
jo ka.abe se nikle jagah dair men ki
mile un buton ko makan kaise kaise
farishte bhi ghayal hain tir-e-ada ke
nishana hue be-nishan kaise kaise
jo ḳhanjar ruka chaḌh ga.i un ki tevri
vo bigḌe dam-e-imtihan kaise kaise
idhar maut udhar vo dam-e-naz.a aa.e
ikaTTha hue mehrban kaise kaise
kabhi bijli taḌpi kabhi andhi aa.i
baḌhe dushman-e-ashiyan kaise kaise
mire jurm mahshar men karti hai ifsha
mire munh pe meri zaban kaise kaise
mohabbat ke hathon hue zulm kya kya
ga.e jaan se naujavan kaise kaise
nishan miT ga.e naam phir bhi hain baaqi
javan the tah-e-asman kaise kaise
karun yaad kis kis ko kis kis ko ro.uun
‘hafiz’ uTh ga.e mehrban kaise kaise
Leave a Reply