taDap uThta Hun Yaadon Se lipaT Kar Sham Hote Hi

Rashid Anwar Rashid

taḌap uThta huun yadon se lipaT kar shaam hote hi

mujhe Dasta hai mera sard bistar shaam hote hi

parinde ashiyanon se panahen manga karte hain

badalne lagta hai ankhon ka manzar shaam hote hi

har ik lamha na.i yalghar ka ḳhatra satata hai

muḳhalif samt se aate hain lashkar shaam hote hi

main buḌha ho chala huun phir bhi maan takid karti hai

mire beTe na jaana ghar se bahar shaam hote hi

ḳhudaya ḳhair aḳhir kaun si basti men aa pahuncha

paḌosi phenkne lagte hain patthar shaam hote hi

na jaane in dinon ḳhamosh sa rahta hai kyuun din men

ubal paḌta hai jazbon ka samundar shaam hote hi

ujale men kisi surat safar to kaT hi jaata hai

miyan ‘rashid’ magar lagti hai Thokar shaam hote hi